الوثائقي دا ما جادي ابدا في حركة الراوي البيحكي -زي رجال العصابات- قصة واحدة من أهم الاسر الفلورنسية والكانت -بحق- الأب الروحي لعصر النهضة. غايتو! متعة المزيكا الترقبية واللفظ الايطالي الرويان للأسماء والكلمات.
لكنها قصة مثيرة للاهتمام حقا، حول مقامرة ميديتشي الأول-جيوفاني- عندما راهن على قرصان نبيل (همباتي بحري) كان ساب القرصنة ودخل الكنيسة، وقرر في لحظة سادت فيها الفوضى في الفاتيكان انو يرشح روحو لحدي منصب البابا.. لكن الحكاية دي كانت محتاجة تمويل لحملة ترشيحو، والتي شارك فيها بصبر ميديتشي الأول لحدي ما صاحبنا دا اترقى وبقا كاردينال ثم -فعلا بقا البابا جون الثالث والعشرين (او بحسب الويكبيديا كان الانتي بابا- لأنو كان في بابا تاني برضو شايف روحو شرعي- المهم جوطة كدا)
اسرة الميديتشي تقدر تقول انهم واضعي أساس فكرة "البنك" كما نعرفه اليوم. وكان بنك الميديشي البنك الأساسي في كل اوروبا . ودا بفضل البابا البقاهم "محاسبو الرب" :)
الوثائقي من اربعة اجزاء وظريف جدا خلطة بتاعت The God Father لأنو في حرب عصابات وكدا على حصة في تاريخ الفنون اذ انو بيحكي عن بوتيشيللي و دوناتيللو ومايكل انجيلو الكانت بترعاهم اسرة الميديتشي، بالاضافة لرعايتهم لليوناردو دافنشي . وكمان حصة فنية عن اهم المعضلات المعمارية: بالكم المعمار في الوقت داك زي الويبسايت في زمنا دا. مش أي مؤسسة لازم يكون عندها واجهة الكترونية محترمة. أها أي اسرة عريقة الوكت داك كان لازم يكون عندها واجهة معمارية تخلد تاريخها وتعبر عنها. فبتحكي قصة ظريفة عن معماري عبقري اسمو برونيشيللي صاحب دومة فلورنسا الشهيرة. وهم برضو كانو رعاة العالم الفلكي الشهير جاليليو.... رعاية جد.. تقول لي زين ولا دال؟ :)
دا الجزء الأول
التاني
التالت
الرابع والأخير
No comments:
Post a Comment